Noam Chomsky a Trieste!

 

 

 

Noam Chomsky a Trieste!

 

Se impiza la cità, co riva Chomsky:

tuti che cori e se prenota svelti,

fiumi de gente fora del Rossetti

che frizi, la se infervora, domanda.

 

Ne conterà ben lui quel che sucedi,

che ‘l ga studiado, che ‘l capissi tanto:

perché ‘sto slavazon che no finissi,

scarsele svode e strenta a le pensioni?

 

Dentro la sala calerà ‘l silenzio,

co ‘l gran veceto el varderà inte i oci

‘sto mucio de signori e povereti.

Forsi ‘l dirà, savè, no son ‘l messia,

 

anche se parlo s’ceto, go coragio,

e la mia scienza no la go svenduda.

Doman sarò za via, scolteme atenti:

no basta un omo per cambiar ‘sto mondo,

 

ma voi podessi farlo, tuti insieme.

Uscì de casa, per trovarve in piaza,

studè ‘l televisor, sveiè la testa:

fatti non foste a viver come bruti.

 

Diriti pretendè, quei che ve speta,

disè la vostra su acqua e le pensioni,

sui ospedai che i ve sera per far posto

nei hangar a fiamanti bombardieri.

 

Chè la democrazia no xe un presente,

xe un impegno, la lota de ogni giorno,

e se no ve movè, e Trieste dormi

per vù e pei vostri fioi la vedo dura.

 

N.F.